البشير النفزي : تسريب كمية من السيوف والمولوتوف وراء تأجيل مقابلة الترجي

علّق نائب المجلس الوطني التأسيسي عن حزب المؤتمر من أجل الجمهورية،البشير النفزي على الاخبار التي تتهم رئاسة الجمهورية بالوقوف وراء تأجيل مباراة الترجي الرياض التونسي والنادي الصفاقسي من خلال ما نشره على صفحته الخاصة فايسبوك كالتالي:

"مرة أخرى، الإنقلابيين البهلوانيين، حبّو يركبو على الأحداث ويوظفو ماكينتهم الإعلامية..المرّة هذي مع شكون؟؟ مع عشاق الكورة و عشاق الترجي وبداو يحركو في صُنّاعهم ما ثماش ما يمركيو شويا نقاط سياسية ويرَجْعو من الشّباك الناس اللي طردتهم الثورة من الباب.. يا سيدي خليني نقولها بوضوح، أنا نعشق الأولمبي الباجي و الترجي وبرشا أحبابي يعشقوا الإفريقي والنجم والنادي الصفاقسي والملعب التونسي و غيرهم و أنا أول واحد نشجعهم كيف يمثلوا تونس و إلا كيف ما يُبدعوا في مقابلاتهم المحلية..في رئاسة الجمهورية، برشا تعشق الترجي وبرشا تعشق بقية الأندية..

و للي موش فاهم الموضوع، نقول إنو إلي تجبدت في الكتاب الأسود هي هيئة مديرة للترجي وقتها وعلى خلفية علاقاتها بفساد إعلامي، وهذا واقع...

نرجع ونقول كإنسان عاشق للترجي، ما يشرفنيش إنو نربط سمعة جمعيتي بواحد إتعدى بيها، على خاطر الترجي وتاريخها أكبر من سليم شيبوب وغيرو، على خاطر اللي هو شيخ الأندية، ما يقِفش على أشخاص وما نتشرفش اللي أبواق ذليلة من جمعيتي تهتف بحياة أحد رموز الفساد في البلاد.. الترجي، كيما الإفريقي، كيما النجم، كيما النادي الصفاقسي، كيما كل الجمعيات، تعدّاو بيها ناس و رجال تشرّف و ناس للنسيان وناس مصّوا دم الشعب وقت العبودية..مانجيش اليوم نهتف بحياتهم... باش نختم بالتوضيح التالي، جاتني من مصادر أمنية موثوقة إنو مقابلة البارح تأجلت على خاطر لقاو كمية من السيوفة والمولوتوف و العصي، وقع تسريبها في الملعب وبالتالي موش لأسباب أخرى..

و القناة اللي جابت السبسي البارح، عملت حساباتها على أحداث أليمة كانت باش تحصل، إما بقاو الكل في التسلّل، واللي حسبو سي الباجي مامشاش كيما حب."..